Umidlar ham majruh endi,
Yor yo‘lida fido bo‘ldi.
Chegalangan baxt ham bugun
O‘z taxtidan judo bo‘ldi.
Ko‘ngil tortgan jabr uchun
Mening ikki ko‘zim yig‘lar,
Ming yildirki, tosh bag‘riga
Sig‘magan shoh so‘zim yig‘lar.
Kuz bargidek uvoqqina
Jonimda ming to‘zim yig‘lar.
Oysiz tunda tikanlardan
Tirnalangan yuzim yig‘lar.

Sarson dunyo yo‘lim topmay,
Sening sarson quling bo‘ldim.
Gulshan aro bir tikanga
Bog‘liq xazon guling bo‘ldim,
Bevafo chun qalbim yoqib,
Qayta yonmas kuling bo‘ldim,
Ishqsiz dilda armon kafan,
Essiz ketgan diling bo‘ldim.